గర్భకవిత్వం - నేను వ్రాసిన పద్యములు

 తేటగీతి గర్భిత ఉత్పలమాల...

ఉత్పలమాల...

వాలయమున్ ధరన్ సకల ప్రాణులు నిన్గని సన్నుతించుచు

న్నాలయమందునన్ విరుల నర్చనచేయును వేడ్కతోడ  గో

పాల !రమాపతీ! పరమ భక్తిగ గొల్చెడు వారి నెల్లరిన్

తాలిమి తో సదా సముచితమ్ముగ  బ్రోవుమ సాధుపోషకా.!!!

తే.గీ...

సకల ప్రాణులు నిన్గని సన్నుతించు

విరుల నర్చనచేయును వేడ్కతోడ 

పరమ భక్తిగ గొల్చెడు వారి నెల్ల

సముచితమ్ముగ బ్రోవుమ సాధుపోష.!!!

దమనక, మదనవిలసిత, అచల గర్భిత మణిగణనికర వృత్తం...

మణిగణనికరము..

నిరతము తలచెద నిరుపమ సుగుణా

శరణను జనులకు సరణిని  ససియున్

స్ధిరము నొసగుమయ సిరులిడి ధరణిన్

గరుడిరవుతు! హరి !కరుణను గనుమా  !!!

ససి - ఆరోగ్యము.  సంతోషము

అచలము - 1 -

నిరతము తలచెద 

శరణను జనులకు 

స్ధిరము నొసగుమయ

గరుడిరవుతు ! హరి.!!!

 మదనవలసిత - న-న-గ -2 - మధుమతి

నిరుపమ సుగుణా

సరణిని ససియున్

సిరులిడి ధరణిన్

కరుణను గనుమా.!!!

దమనకం.-న న - 3

నిరుపమ గుణ

సరణిని ,ససి

సిరులిడి, ధర

కరుణను గను.!!!

నంది గర్భిత కందము..

కం....

ప్రత్యహమందున విధిగను

సత్యము బల్కిన జనులను సమ్మోదముతో 

సత్యుడు మెచ్చును, మానవ

నిత్యము గాచును ధరణిని, నిజమును గనుమా

 సత్యుడు - రాముడు

ప్రత్యహము - ప్రతిదినము

నంది ..భ  భ 

ప్రత్యహమందున 

సత్యము బల్కిన 

సత్యుడు మెచ్చును

నిత్యము గాచును

ద్వివిధ కందము.

కం ...1

హితమగు కవితాధారణ

వితత మతీ మీకె చెల్లు విజ్ఞానఖనీ!

నతులివె,  జేజే లనరే

మతిమంతులు, మిమ్ము వర్ణ మాతృక మెచ్చున్.!!!

కం... 2

నతులివె, జేజే లనరే

మతిమంతులు, మిమ్ము వర్ణ మాతృక మెచ్చున్

హితమగు కవితాధారణ

వితత మతీ మీకె చెల్లు విజ్ఞానఖనీ.!!!

 అంశము - నూతన సంవత్సర శుభాకాంక్షలు.

నిషిద్ధము - శ, ష, స- (  47)

ఛందస్సు - ఐచ్ఛికము

వీరిచే పోస్ట్ చేయబడింది కంది శంకరయ్య వద్ద 1/01/2019 05:00:00 AM  

కం...

నీతియు ధర్మము నిల్పుచు

గోతులలో బడక గాచి గోపాలుండే

నూతన కారున జనులకు

ప్రీతిని కలిగించు భూరి విజయమ్ములతో!!!

చరవాణి (సాహితీభారతి )

నీవే ప్రాణము సర్వము

నీవే మా తోడు గాదె నిర్ద్వంద్వముగన్

నీవొక నిముషము లేనిదె

దేవుర్లాడెదము గాదె తిరు చరవాణీ!!!

నువ్వుంటే విశ్వమునన్

దవ్వులు గనరాక బోయె  ధరణిని సుమ్మీ

నవ్వుల పువ్వులు మాకై

మవ్వమ్ముగ దెచ్చినావె మాచరవాణీ!!!

మంచికి నుపయోగించిన

నంచితముగ మేలుజరుగు నందరికిలలో

వంచన జేయగ వాడిన

ముంచెదవుగ  జీవితములు భువి చరవాణీ!!!

మిధునవనం---(చిత్రకవిత)

మిధునవనం---(చిత్రకవిత)

చిన్ననాటి ఆనందాలు

చిందించే మకరందాలు

జ్ఞాపకాల తీపిముళ్ళు

జాలువారె కన్నుల నీళ్ళు

గగనంలో గాలిపటాలు

ఇసుకలోన కట్టిన గూళ్ళు

దొంగాటలు కోతికొమ్మచ్చి

దొరికిపోతె  కొట్టిన పచ్చి

రాళ్ళాటలు చింతగింజలు

మళ్ళగట్లపై పరుగులు

తాటాకుల బొమ్మల పెళ్ళి

తాడాటను తీసిన గుంజీ

పంచుకున్న పీచుమిఠాయి

మంచికధల వెన్నెలరేయి

బాధ భయము లేనిదోయి

బాల్యమ్మే ఎంతో హాయి

బొంగరాల గింగరాలు

సంగడీలతో ఆటలు

చెంగు చెంగున గెంతులు

బెంగలేని ఆనందాలు

దసరాలో పువ్వుల బాణం

తీయని వడపప్పు బెల్లము

పల్లెలోన వదిలిన బాల్యం

పంచుకున్న తరగని మూల్యం

బాల్యంలో జ్ఞాపకాలు

మాసిపోని ఆనవాళ్ళు

కాలంలో మైలురాళ్ళు

మరలిరాని మాధుర్యాలు!!!

మిధునవనం - చిత్రం.

మిధునవనం - చిత్రం.

నీతో నేను నీలో నేను

నిలిచుంటాను కడదాకా

నాలో నేను లేనే లేను

నీలో ఉన్నా విడలేకా

ఏనాటి బంధమో

జన్మాల గంధమో

ప్రియతమా.....

నీ నవ్వె నాకు సుప్రభాతము!

నువ్వన్న చోటె స్వర్గధామము!

ఎన్ని దినములు గడిచాయో

ఎవరికి ఎరుకమ్మా

నీతో ఉన్న సమయాన

యుగమే క్షణమమ్మా

కష్టసుఖాలు కలబోసుకుని

నను నడిపెను నీ చేయి

ఇష్టసఖీ !నువు లేకుంటే

నాబ్రతుకే లేదోయి

ప్రియతమా …..

నీ మాటె నాకు మంత్రపుష్పము!

అది లేని నాడు నేనె శూన్యము!

నీ కన్నుల్లో కన్నీరేలా

నవ్వవె నువ్వు విరిబాలా

పూవే లేని తావుంటుందా?

తోడే లేని నీడుంటుందా?

ప్రియతమా ..

నేనుంటినమ్మ నీకు తోడుగా!

జోలాలి పాడనా తీయగా…..!!!

మిధునవనం చిత్రం

మిధునవనం చిత్రానికి...

ఏయే ఋతువుల కాసే వాటిని

ఆయా వేళల అమ్ముకునీ

సాగిస్తోంది జీవనయానం

సంతోషంతో ఈ అవ్వ

కొడుకులు వద్దని చెప్పిననూ

కోడలు ప్రేమగ కసిరిననూ

చక్కని వృత్తిని ఎన్నుకునే

మక్కువ మీరగ ఈ అవ్వ

కష్టపడుటలో ఆనందం

కూర్చుని తింటే రాదంటూ

శ్రమయే శక్తిని ఇచ్చుననీ

నవ్వుతు చెప్పెను ఈ అవ్వ

రెక్కల్లో బలముంటే చాలును

ఆకలి డొక్కలు నింపగ వచ్చును

అవసరమున్నా లేకున్నా

అందుకె పనిచేయును అవ్వ

అవ్వచెప్పిన జీవిత సత్యం

అందిస్తోంది తారకమంత్రం

అదిఏదంటే పనియే దైవం

శ్రమలో ఉన్నది ఆరోగ్యం!!!

మిధునవనం)(చిత్రానికి)

ద్విపదలు..(మిధునవనం)(చిత్రానికి)

కురిసేటి వానలో గూర్చుంటి నేను

మరిచేవు ప్రియతమా మాటిచ్చి నావె

                                      

ముక్కలైన మదిలోనె ముసిరె మేఘాలు

చక్కనమ్మ చెక్కిలిపై జారె నీలాలు

చిన్నారి మనసునే చిరుగాలి తడిమె

చిగురించు భావాలు చినుకులై తడిపె

నాలోని భావాలునను తడిపె చూడు

లోలోన  బిడియాలు కసిరేను నేడు